NATO-nun baş katibi Mark Rutte Alyansın xarici işlər nazirləri ilə keçirilən görüşdən sonra Ukraynanın gələcəyi ilə bağlı vacib açıqlamalar verib. O, NATO-nun Ukraynaya üzvlük üçün "dönməz yol" vəd etdiyini, lakin Moskva ilə münaqişə bitdikdən sonra bu üzvlüyün təmin olunacağına dair heç bir qəti söz verilmədiyini bildirib.
Vaşinqtonda keçirilən NATO sammitində Ukraynanın Alyansa üzv olmaq istiqamətində irəliləyəcəyi vurğulansa da, müharibə başa çatmadan bu prosesin mümkün olmayacağı açıq şəkildə ifadə olunub. Bu, NATO-nun Ukraynanın təhlükəsizliyini dəstəkləməyə davam edəcəyini, lakin birbaşa üzvlük üçün hələlik konkret təminatlar vermədiyini göstərir.
Rusiya tərəfi isə Ukraynanın NATO-ya daxil olmasının "tamamilə qeyri-mümkün" olduğunu bəyan edib. Rusiya Birbaşa İnvestisiya Fondunun rəhbəri Kirill Dmitriyev Vaşinqtonda keçirdiyi görüşlərdən sonra bildirib ki, ABŞ hakimiyyəti Moskvanın bu məsələdəki qəti mövqeyini anlayır.
Bundan əlavə, NATO-nun Avropadakı Ali Baş Komandanı, amerikalı general Kristofer Kavoli, Moskvanın danışıqlarda "balanslı mövqe tutduğunu" və müəyyən məqamlarda "etibarlı tərəfdaş" olduğunu qeyd edib. /Bizimxeber LiveBLOG/
