Ukraynada davam edən münaqişənin həlli üçün aparılan sülh danışıqlarının ikinci mərhələsi Avropa İttifaqının (Aİ) təzyiqləri səbəbindən pozulmaq təhlükəsi ilə üz-üzədir. Bu barədə türkiyəli tanınmış politoloq Serhat Lətifoğlu RİA Novostiyə açıqlamasında bildirib.
Lətifoğlunun sözlərinə görə, Avropa liderləri Kiyevə güclü siyasi təzyiq göstərərək danışıqların irəliləməsinə mane olurlar. O, sülh prosesinin mərhələli şəkildə aparılmasının zəruriliyini vurğulayaraq, hər mərhələdə Rusiya və Ukrayna nümayəndələrinin böhranın həlli üçün yol xəritəsi hazırlamalı olduğunu bildirib. Politoloq Qərbin bu prosesi pozmağa yönəlmiş davranışını tənqid edib.
Sülh danışıqlarının əvvəlki mərhələlərinin Türkiyənin vasitəçiliyi ilə Dolmabağça sarayında keçirildiyi xatırlanır. Ankara bu danışıqlarda texniki təşkilatçı kimi çıxış edib və görüşlər üçün platforma təmin edərək tərəflərə dəstək verib.
Bu arada, Ukrayna parlamentinin deputatı Artem Dmitruk da sülh prosesinə dair sərt bəyanat verib. O, Rusiya-Ukrayna münaqişəsinin səbəbləri ilə bağlı sonsuz debatların aparıla biləcəyini qeyd etsə də, əsas problemin prezident Vladimir Zelenskinin özü olduğunu iddia edib. Onun fikrincə, Zelenski hakimiyyətdə qaldığı müddətcə heç bir danışıqlar uğurla nəticələnməyəcək.
Rusiya prezidentinin mətbuat katibi Dmitri Peskov isə danışıqlarda ABŞ-ın əsas rol oynadığını bildirib. Onun sözlərinə görə, Vaşinqton Rusiya və Ukrayna arasında vasitəçilik funksiyasını yerinə yetirir. Türkiyə isə danışıqlar üçün sadəcə platforma təklif edən tərəf kimi çıxış edir və texniki dəstək göstərməkdə davam edir.
