ABŞ prezidenti Donald Tramp bəyan edib ki, ölkənin əksər ticarət tərəfdaşları üçün tətbiq edilən 10 faizlik baza tarifinə bəzi istisnalar mümkün ola bilər. Bununla belə, o, bu tarif səviyyəsinin ticarət sazişləri üzrə danışıqlar aparmaq istəyən ölkələr üçün minimum hədd olduğunu vurğulayıb.
Prezident istisnaların hansı ölkələri və ya sahələri əhatə edə biləcəyini dəqiqləşdirməsə də, onları “açıq-aşkar səbəblərə əsaslanan hallar” kimi xarakterizə edib.
“Bəli, bəzi istisnalar mümkündür, amma mən deyərdim ki, 10% minimumdur,” – deyə Tramp bildirib.
Trampın tariflərə dair bu açıqlamaları, həftə ərzində qlobal maliyyə bazarlarında baş verən təlatümlü gedişatın fonunda səslənib. ABŞ prezidenti bu həftə onlarla ölkəyə yeni, yüksək tariflər tətbiq etsə də, bu addım investorlar və müəssisələr arasında ciddi narahatlıq doğurub və nəticədə yeni tariflər yalnız bir neçə saatlıq gecikmə ilə qüvvəyə minib.
Hazırda ABŞ qlobal idxala 10 faizlik ümumi tarif tətbiq etməklə yanaşı, polad, alüminium və avtomobil kimi sahələrə 25 faizlik əlavə tariflər də saxlayır. Dünyanın ikinci ən böyük iqtisadiyyatı olan Çin isə 145 faizlik tariflərlə üz-üzə qalıb. Bu isə digər ölkələri Vaşinqtonla ticarət sazişləri üzrə sürətli razılaşmalar əldə etməyə vadar edir.
Xatırladaq ki, aprelin 9-da Tramp bu tarif artımlarını 90 gün müddətinə dayandırdığını açıqlamışdı. Bu addıma cavab olaraq Avropa İttifaqı da ABŞ-a qarşı nəzərdə tutulan cavab tədbirlərini müvəqqəti olaraq təxirə salıb.
