Azərbaycanda media və vətəndaş cəmiyyəti fəalları ilə bağlı diqqət mərkəzində olan "Toplum TV" işi üzrə məhkəmə prosesi başlayıb. Bakı Ağır Cinayətlər Məhkəməsində hakim Azər Tağıyevin sədrliyi ilə iş üzrə ilk hazırlıq iclası keçirilib.
Məhkəmənin başlanğıc iclası əsasən prosedur məsələlərinə həsr olunub. Təqsirləndirilən şəxslərin anket məlumatları dəqiqləşdirilib. Prosesin ən vacib məqamlarından biri müdafiə tərəfinin vəsatətləri olub.
Vəkillər həbsdə olan şəxslərin (o cümlədən "Toplum TV"nin həmtəsisçiləri Ələsgər Məmmədli (Əhmədoğlu) və Akif Qurbanov, eləcə də III Respublika Platformasının qurucu üzvü Ruslan İzzətli) ev dustaqlığına buraxılması üçün vəsatət qaldırıblar.
Məhkəmə Ələsgər Məmmədlinin səhhəti ilə bağlı qaldırılan vəsatətə baxılacağını bildirsə də, digər təqsirləndirilən şəxslərin ev dustaqlığına buraxılması ilə bağlı vəsatətləri təmin etməyib.
Bundan əlavə, Akif Qurbanovun işə yeni cəlb olunan tanınmış vəkili Fuad Ağayev cinayət işinin materialları ilə ətraflı tanış olmaq üçün məhkəmədən vaxt istəyib. Bu vəsatət nəzərə alınaraq, məhkəmənin hazırlıq iclası aprelin 24-dək təxirə salınıb.
Xatırladaq ki, bu iş "Toplum TV"nin ofisində və bir neçə başqa ünvanda keçirdiyi əməliyyatla başlayıb. İlkin olaraq saxlanılan şəxslərə qarşı Cinayət Məcəlləsinin 206.3.2-ci (qaçaqmalçılıq, qabaqcadan əlbir olan bir qrup şəxs tərəfindən törədildikdə) maddəsi ilə ittiham irəli sürülmüşdü. Lakin sonradan iş üzrə təqsirləndirilən şəxslərə qarşı ittihamlar xeyli genişləndirilib və onlara əlavə olaraq Cinayət Məcəlləsinin daha bir neçə ağır maddəsi ilə ittihamlar irəli sürülüb. /Bizimxeber LiveBLOG/
