ABŞ və Avropa İttifaqının sanksiyaları yumşaltmasından sonra, Suriya hakimiyyəti Rusiyada pul çapını dayandırmaq qərarına gəlib. "Bizimxeber" bildirir ki, bu barədə "Reuters" agentliyi məlumat yayıb.
Bildirilib ki, Suriya artıq "Qoznak" mətbəəsində yeni əskinaslar sifariş etməyəcək. Bunun əvəzinə, BƏƏ və Almaniyadakı müasir mətbəələrlə, o cümlədən Oumolat, Bundesdruckerei və Giesecke+Devrient ilə danışıqlara başlayıb.
Yeni çap olunacaq əskinasların dizaynında əsas dəyişikliklərdən biri, devrilmiş prezident Bəşər Əsədin şəkillərinin valyutadan çıxarılmasıdır. Bu dəyişiklik Əsəd rejiminin sonu ilə rəmzi əlaqələndirilir və Suriyanın gələcəkdə daha açıq və neytral maliyyə sisteminə keçid etdiyinin siqnalı kimi dəyərləndirilir.
Suriyada nağd pul qıtlığı ciddi problemlərə səbəb olur. Banklar vətəndaşlara əmanətlərini qaytarmır, müəssisələr əmək haqqı və təchizat xərclərini ödəyə bilmir. Faktiki olaraq bank sistemi iflic vəziyyətindədir. Rəsmilər bunun səbəbini müxtəlif yollarla izah edir. Bəziləri xalqın valyuta (xüsusilə ABŞ dolları) yığdığını deyir, bəziləri isə hökumətin süni şəkildə məzənnəni saxlamaq üçün pul buraxmadığını düşünür.
Əgər 2011-ci ildə 1 ABŞ dolları 50 Suriya funtu idisə, hazırda qara bazarda 1 dollar 10 000 Suriya funtuna satılır. Bu isə dövlətin iqtisadi idarəetməsinin çökməsinin açıq göstəricisidir.
Suriya hökumətinin qərarı təkcə iqtisadi yox, həm də geosiyasi baxımdan əhəmiyyətlidir. Əsəd rejiminin devrilməsindən sonra, Suriya Qərb və Ərəb dünyası ilə əlaqələri bərpa etməyə çalışır. Rusiya ilə yaxınlaşmanın yerini təhlükəsiz, modern və beynəlxalq etimada malik tərəfdaşlarla əməkdaşlıq almaqdadır.
Bu addım post-Əsəd Suriyasının yeni mərhələyə keçdiyini göstərir. Maliyyə islahatları və xarici əməkdaşlıq Suriyanın yenidən qurulması yolunda ilk siqnallardandır. Lakin bank böhranı və valyuta iflası hələ də ölkəni dərin sosial-iqtisadi uçurumda saxlayır.
