/BX LiveBLOG/
"Ukraynaya sülhməramlı kontingentin göndərilməsi Rusiyanın razılığı olmadan həyata keçirilə bilər".
"Bizimxeber" bildirir ki, bunu Fransa prezidenti Emmanuel Makron “Le Parisien” nəşrinə müsahibəsində bildirib.
Onun sözlərinə görə, hazırda yekunlaşmaq üzrə olan Fransa-Britaniya planı artıq bir neçə ölkənin marağına səbəb olub. "Məqsəd əsgər kütləsinə sahib olmaq deyil, çünki Avropanın ən böyük ordusu Ukrayna ordusudur. Əvəzində söhbət təlim proqramlarını çatdırmaq üçün hər ölkədən bir neçə min nəfəri əsas yerlərə yerləşdirməkdən və uzunmüddətli dəstəyimizi nümayiş etdirməkdən gedir" - deyə Makron bildirib.
Hərbi ssenarilərdə Kiyev, Odessa və Lvov kimi şəhərlər var.
Eyni zamanda Makron deyib ki, sülhməramlıların yerləşdirilməsi qərarında Rusiya lideri Vladimir Putinin razılığı tələb olunmur.
“Ukrayna suverendir, əgər o, müttəfiq qoşunlarının onun ərazisində olmasını xahiş edirsə, buna razı olub-olmamaq Rusiyanın işi deyil”.
Bu arada "Financial Times" xəbər verdiyi kimi, fevralın 18-də liderlərin Parisdə fövqəladə sammiti zamanı Makron Avropa sülhməramlı qüvvələrini birbaşa onun üzərində deyil, gələcək demarkasiya xəttinin arxasında yerləşdirməyi təklif edib. İtaliya, Böyük Britaniya, Latviya, Almaniya, Kanada və Avstraliya daha əvvəl Ukraynaya sülhməramlı birləşmələr göndərməyə hazır olduqlarını açıqlayıblar. Rumıniya sülhməramlı qoşunlar üçün tranzit məntəqəsi olmağı təklif edib. Bunun müqabilində Polşa dərhal öz qoşunlarını cəlb etməyi planlaşdırmadığını elan edib.
Məlumdur ki, Böyük Britaniyanın baş naziri Key Starmer ABŞ prezidenti Donald Trampa 30 min avropalı hərbçinin Ukraynada yerləşdirilməsini nəzərdə tutan sülhməramlı planı təqdim etməli idi.
