/BX LiveBLOG/

ABŞ və Çin arasında davam edən iqtisadi və siyasi rəqabət yeni bir mərhələyə qədəm qoyub. 

Nüfuzlu "Bloomberg" agentliyinin öz mənbələrinə istinadən yaydığı xəbərə görə, Çin hakimiyyəti ölkə şirkətlərinin ABŞ-da yeni investisiya layihələri həyata keçirməsinə qeyri-rəsmi məhdudiyyətlər tətbiq etməyə başlayıb.

Xəbərə görə, bu addım birbaşa iki ölkə arasında artan ticarət gərginliyi ilə əlaqəlidir. Mənbələr bildirib ki, Çinin əsas planlama orqanı olan Milli İnkişaf və İslahat Komissiyasının (NDRC) regional bölmələrinə şifahi şəkildə tapşırıq verilib ki, ABŞ-a investisiya yatırmaq istəyən Çin şirkətlərinin yeni müraciətlərinin qeydiyyatını və təsdiqini dayandırsınlar.

Bu, hələlik rəsmi qanun və ya qayda deyil, daha çox şifahi göstəriş xarakteri daşıyır. Bu, Pekinin vəziyyətdən asılı olaraq siyasətini çevik şəkildə dəyişməsinə imkan yaradır.

Məhdudiyyətlərin Çin şirkətlərinin ABŞ-da hazırda davam edən investisiya layihələrinə təsir etmədiyi vurğulanır. Hədəf yeni kapital axınlarıdır.

Müşahidəçilər hesab edir ki, bu addım Çin hökumətinin ölkədən çıxan maliyyə axınlarına nəzarəti gücləndirmək cəhdidir. Eyni zamanda, Pekin bu mexanizmdən ABŞ ilə ticarət və digər məsələlər üzrə danışıqlarda potensial bir təzyiq vasitəsi kimi istifadə edə bilər. Bu qeyri-rəsmi məhdudiyyətlərin nə qədər davam edəcəyi və ya gələcəkdə rəsmiləşdirilib-rəsmiləşdirilməyəcəyi hələlik məlum deyil.

Bu addım Çinin ABŞ-ın müxtəlif sahələrdəki təzyiqlərinə cavab vermə üsullarından biri kimi görünür. Maraqlıdır ki, bu xəbərdən bir qədər əvvəl Çin Xarici İşlər Nazirliyinin nümayəndəsi ABŞ-ın Rusiya neftinə qarşı ikinci dərəcəli sanksiyalarının Çinə tədarüklərə təsir etməyəcəyini və xarici amillərin Rusiya-Çin əməkdaşlığına mane ola bilməyəcəyini bildirmişdi. Bu da Pekinin ABŞ-ın təzyiq cəhdlərinə qarşı mövqeyini göstərir.

Beləliklə bu addımlar Çinin ABŞ-a yönələn yeni investisiyaları qeyri-rəsmi şəkildə məhdudlaşdırması iki nəhəng iqtisadiyyat arasındakı münasibətlərin daha da gərginləşdiyinin göstəricisidir. Bu, həm potensial investorlar, həm də qlobal iqtisadiyyat üçün əhəmiyyətli nəticələrə səbəb ola biləcək bir addımdır. /Bizimxeber Live BLOG/