Ukrayna Təhlükəsizlik Xidməti (SBU) Rusiya ordusuna növbəti strateji zərbəni endirib. “Veb” adlı xüsusi əməliyyat çərçivəsində həyata keçirilən dron hücumu zamanı Rusiyanın uzaq mənzilli radar aşkarlayan A-50 AWACS təyyarəsi məhv edilib.
Hədəf Rusiya Federasiyasının İvanovo vilayətində yerləşən hərbi aerodrom olub. Bu barədə açıq mənbələrdən informasiya toplayan OSINT analitikləri “GEOINT X” adlı platformada məlumat yayıblar. Hücumun nəticələri “Mizarvision” şirkətinin təqdim etdiyi yüksək dəqiqlikli peyk görüntülərində aydın görünür.
Kadrlarda A-50 tipli bir neçə təyyarənin zədələndiyi, onlardan birinin isə ciddi şəkildə sıradan çıxdığı müşahidə olunur. İlkin məlumata görə, həmin təyyarəni bərpa etmək mümkün deyil.
Rusiya ordusu tərəfindən "uçan radar" kimi tanınan A-50 təyyarələri İl-76 ağır nəqliyyat təyyarəsi bazasında hazırlanıb və fırlanan radar antenası ilə təchiz olunub. Bu təyyarələrin əsas funksiyası hava məkanında döyüş təyyarələrini, raketləri və digər hava obyektlərini aşkar etmək və koordinasiya verməkdir.
Modernləşdirilmiş A-50U versiyasında ruslar daha da təkmilləşdirilmiş radiotexniki komplekslər quraşdırıblar. Bu sistem alçaqdan uçan, az görünən hədəfləri belə aşkar etmək qabiliyyətinə malikdir və eyni anda çoxlu sayda obyekt izləyə bilər.
Bu hücum Rusiya üçün həm texnoloji, həm də simvolik baxımdan ciddi zərbə sayılır. A-50U kimi resursların məhv edilməsi, Rusiya hərbi aviasiyasının hava məkanında koordinasiya imkanlarını zəiflədə bilər. Ukraynanın pilotsuz uçan aparatlarla belə yüksək dəyərli hədəfləri vurması isə müasir döyüş texnologiyalarında oyun qaydalarının dəyişdiyinə işarə edir.
