“The Wall Street Journal” diplomatik mənbələrə istinadən xəbər verir ki, Fransa və Böyük Britaniya Krım da daxil olmaqla Ukraynanın bəzi ərazilərinin Rusiya tərəfindən faktiki nəzarətdə olduğunu tanımağa hazırdır. Məlumata görə, bu ölkələr Kiyevin bu əraziləri rəsmi olaraq itirdiyini etiraf etmədən, yalnız de-fakto olaraq bu vəziyyətlə razılaşmasına üstünlük verəcəklər.
Diplomatik dairələr bu yanaşmanı 1953-cü ildə Koreya müharibəsinə son qoyan və Şimali Koreya ilə Cənubi Koreya arasında imzalanan atəşkəs sazişi ilə müqayisə edirlər. O vaxtdan bəri tərəflər formal olaraq sülh müqaviləsi imzalamadan yalnız faktiki vəziyyəti qəbul ediblər.
Qərb ölkələri bu prosesin fonunda Ukraynanın etibarlı təhlükəsizlik zəmanətləri əldə etməsinin vacibliyini də vurğulayırlar.
Rusiyadan isə bu xəbərlərə sərt reaksiya gəlib. Dövlət Dumasının deputatı Dmitri Belik bildirib ki, Avropa İttifaqının diplomatik rəhbəri Kaja Kallasın Krımı Rusiya kimi tanımaqdan imtina etməsi "siyasi korluqdur". Onun sözlərinə görə, Rusiya öz ərazilərinin tanınmasına ehtiyac duymur.
Krımdan olan deputat, istefada olan general-mayor Leonid İvlev isə Kaja Kallasın tarixi öyrənməsi və bu sahədəki “boşluqları doldurması” lazım olduğunu bildirib. O, Estoniyalı siyasətçiyə keçmiş pioner məktəblərində tarix dərslərini buraxmamaq barədə ironik tövsiyə də verib. Bu açıqlama, Kallasın Krımın Rusiya tərəfindən ilhaqını tanımadığına dair bəyanatından sonra səsləndirilib.
