Pakistanın Milli Təhlükəsizlik Komitəsi (MTK) çərşənbə günü fövqəladə iclas keçirərək, Hindistanın son hücumlarına cavab olaraq ölkə ordusuna sərbəst hərəkət səlahiyyəti verildiyini bəyan edib.
İclas baş nazir Şehbaz Şərifin rəhbərliyi ilə keçirilib və orada federal nazirlər, hərbi rəhbərlik və təhlükəsizlik strukturlarının nümayəndələri iştirak ediblər. Komitə Pakistanın BMT Nizamnaməsinin 51-ci maddəsinə əsasən özünümüdafiə hüququnu təsdiqləyərək, hərbi cavab tədbirlərinin görülməsinə yaşıl işıq yandırıb.
Bəyanatda qeyd olunub ki, Hindistan ordusunun ötən gecə Pakistan və Azad Cammu və Kəşmirdə mülki əraziləri hədəfə alan raket və hava hücumları nəticəsində aralarında qadın və uşaqların da olduğu azı 26 mülki şəxs həyatını itirib. Pakistan tərəfi cavab olaraq Hindistanın beş döyüş təyyarəsinin, o cümlədən üç Rafale qırıcılarının vurulduğunu və bir neçə hərbi mövqenin, o cümlədən briqada qərargahının məhv edildiyini açıqlayıb.
MTK-nın bəyanatında bildirilir ki, Pakistan öz seçdiyi vaxtda, məkanda və tərzdə cavab vermək hüququnu özündə saxlayır. Sülhə sadiqik, lakin suverenliyimiz və milli ləyaqətimiz heç vaxt güzəştə getməyəcək.”
Bundan əlavə, komitə Hindistanın Neelum-Jhelum su elektrik layihəsinə hücum cəhdini də pisləyib və bu addımı beynəlxalq hüququn açıq pozuntusu kimi dəyərləndirib.
İnformasiya naziri Attaullah Tarar bildirib ki, Pakistanın əks-hücumları nəticəsində Hindistanın Nəzarət Xətti yaxınlığındakı Chura kompleksində “ağ bayraq” qaldırılması müşahidə olunub.
Baş nazir Şehbaz Şərifin bu gün saat 15:00-da xalqa müraciət edəcəyi, qarşıdakı siyasət addımlarını açıqlayacağı gözlənilir. Eyni zamanda, federal kabinetin iclası çağırılıb ki, burada MTK-nın qərarları ratifikasiya olunacaq.
Komitə beynəlxalq ictimaiyyəti Hindistanın təxribatları barədə məlumatlandırmağa və regiondakı gərginliyin sülhə yaratdığı təhdidləri ciddiyə almağa çağırıb.
