Özbəkistanda Rusiya-Ukrayna müharibəsində Vaqner Özəl Hərbi Şirkətinin (PMC) sıralarında döyüşdüyü müəyyən edilən 50 yaşlı kişi beş il müddətinə azadlıqdan məhrum edilib. Bu barədə RİA Novosti agentliyi məlumat yayıb.
Məlumata görə, 1975-ci il təvəllüdlü A.M. barəsində Özbəkistan Cinayət Məcəlləsinin 154-cü maddəsinin 1-ci hissəsi (muzdlu fəaliyyət) və 276-cı maddəsinin 1-ci hissəsi (qanunsuz olaraq narkotik vasitə saxlama) ilə ittiham irəli sürülüb.
Məhkəmə hökmünə əsasən, təqsirləndirilən şəxs 5 il 1 ay müddətinə ümumi rejimli cəzaçəkmə müəssisəsində cəza çəkəcək.
Özbəkistan hökuməti bu addımı ölkə qanunlarına uyğun olaraq “qanunsuz silahlı birləşmələrdə iştirak” kimi qiymətləndirib. Qeyd edək ki, Mərkəzi Asiya ölkələri — o cümlədən Qazaxıstan, Qırğızıstan və Tacikistan — vətəndaşlarının xarici silahlı münaqişələrdə iştirakını qadağan edir.
Bundan əvvəl Qırğızıstanda da Vaqnerlə əlaqəli fəaliyyətə görə bir neçə şəxs saxlanılmışdı. Rusiya Evinin əməkdaşı Nataliya Sekerina və jurnalist Viktor Vasilyev muzdluların cəlb olunmasında iştirak etməkdə şübhəli bilinərək həbs olunublar. Sekerinanı 10 ilədək həbs cəzası gözləyir.
