Türkiyənin siyasi səhnəsində müzakirə olunan İstanbul Böyükşəhər Bələdiyyə sədri Əkrəm İmamoğlunun həbsinə dair apellyasiya şikayəti rədd edilib. İstanbulun 10-cu Cəza Məhkəməsi, 14 aprel tarixində keçirilən iclasda apellyasiyanı qəbul etməyərək işi birinci instansiya cinayət məhkəməsinə qaytarıb. Bu qərar ölkədə onsuz da gərgin olan siyasi atmosferi bir qədər də qızışdırıb.
İmamoğlu və onun sözçüsü Murat Onqun martın 23-dən bəri həbsdə saxlanılır. Onlara qarşı irəli sürülən ittihamlar – korrupsiya və siyasi motivli fəaliyyət – təkcə hüquqi proses deyil, həm də siyasi mübarizə kimi qiymətləndirilir. Müxalif qüvvələr bu həbsi, prezident Rəcəb Tayyib Ərdoğanın əsas rəqibini zərərsizləşdirmək cəhdi kimi görür.
İmamoğlunun saxlanılması qərarı genişmiqyaslı etirazlara səbəb olub. İstanbul başda olmaqla bir çox şəhərdə insanlar küçələrə axışdı. Etirazlara sərt müdaxilə edən hökumət qüvvələri, iki minə yaxın insanı – əsasən də tələbələri – saxlayıb.
Əkrəm İmamoğlu, Cümhuriyyət Xalq Partiyası tərəfindən 2028-ci il prezident seçkiləri üçün namizəd kimi irəli sürülüb. Onun populyarlığı xüsusilə şəhər əhalisi və gənclər arasında artmaqdadır. Eyni zamanda, İmamoğlu hökumətə yaxın şirkətlərə qarşı boykot çağırışları edərək, iqtisadi müqavimət hərəkatını da canlandırır.
Bütün bu proseslər fonunda Türkiyə müxalifəti erkən seçki çağırışlarını daha da gücləndirib. Onlar hesab edirlər ki, bu hadisə, ölkədə demokratiyanın gələcəyinin sual altında olduğunu göstərir.
İndi diqqətlər birinci instansiya məhkəməsindədir. Həmin məhkəmə İmamoğlu və Murat Onqun taleyi ilə bağlı son qərarı verməlidir. Azadlığa buraxılacaqlarmı, yoxsa həbsdə qalacaqlarmı?
