Rusiyanın xarici işlər naziri Sergey Lavrov Ermənistana iki günlük işgüzar səfərə gəlib. Onu İrəvan hava limanında Ermənistan xarici işlər nazirinin müavini Mnatsakan Səfəryan, eləcə də hər iki ölkənin səfirləri, Qurgen Arsenyan (Ermənistanın Rusiyadakı səfiri) və Sergey Kopırkin (Rusiyanın Ermənistandakı səfiri) qarşılayıblar.
Kadrlarda Lavrovun təyyarədən enərək Rusiya səfiri ilə əl sıxması, daha sonra isə Ermənistan rəsmiləri ilə qısa söhbət etməsi əks olunub.
Səfər çərçivəsində Lavrovun Ermənistanın xarici işlər naziri Ararat Mirzoyan ilə danışıqlar aparması, eləcə də baş nazir Nikol Paşinyan və prezident Vaaqn Xaçaturyanla görüşləri nəzərdə tutulub. Qeyd edək ki, Lavrov sonuncu dəfə İrəvana 2022-ci ilin iyun ayında səfər etmişdi.
Danışıqlarda 2024-cü il oktyabrın 8-də əldə olunan razılaşmalar və 2025–2026-cı illər üçün Xarici İşlər Nazirlikləri arasında məsləhətləşmə planı gündəmdədir. Həmçinin Mirzoyanın 2024-cü ilin yanvarında Moskvaya etdiyi səfərin nəticələri də müzakirə ediləcək.
Rusiya Xarici İşlər Nazirliyinin məlumatına görə, görüşlərin əsas mövzuları ikitərəfli əməkdaşlığın geniş spektri, Avrasiya inteqrasiya birlikləri çərçivəsində qarşılıqlı fəaliyyət, beynəlxalq təşkilatlarda, xüsusilə də BMT-də mövqelərin uzlaşdırılması olacaq.
Tərəflər regional təhlükəsizlik məsələlərini, o cümlədən Ermənistan-Azərbaycan münasibətləri və Ermənistan-Türkiyə normallaşma prosesi üzrə fikir mübadiləsi aparacaqlar.
Nazir Lavrov səfər zamanı Rusiya-Ermənistan Universitetində çıxış edəcək, Rusiya universitetlərinin filiallarında təhsil alan tələbələr, müəllimlər və ekspertlərlə görüşəcək. Eyni zamanda “Rus Evi”ndə yaşayan rusiyalı həmvətənlərlə də görüş planlaşdırılıb.
Səfər çərçivəsində Lavrov naməlum əsgərin məzarı önündə “Əbədi məşəl”ə gül dəstələri qoyacaq və “Erməni soyqırımı qurbanlarının xatirəsinə ucaldılmış abidə” önünə əklil təqdim edəcək.
