Ukrayna Silahlı Qüvvələri Rusiyanın qərbində yerləşən Kursk bölgəsinə raket hücumu təşkil edib. Yerli mənbələrə görə, sərhədin bir neçə hissəsində dağıntılar baş verib, ardınca isə xüsusi texnika ilə minalanmış sahələr keçilərək hücum əməliyyatları davam etdirilib.
Rusiyanın baş hərbi rəsmisi keçən ay bəyan etmişdi ki, Ukrayna qoşunları Kursk bölgəsindən çıxarılıb və bununla da İkinci Dünya Müharibəsindən bu yana Rusiya ərazisinə edilən ən böyük müdaxiləyə son qoyulub. Eyni zamanda bildirilib ki, Rusiya Ukraynanın Sumı bölgəsində bufer zona yaradıb.
Telegram sosial şəbəkəsində fəaliyyət göstərən “RVvoenkor” adlı müharibə bloggeri hücumun gedişatını belə təsvir edib: “Düşmən gecə saatlarında körpüləri raketlərlə partlatdı, səhər isə zirehli dəstələrlə hücuma keçdi. Minaaxtaran maşınlar mina sahələrində keçidlər açdı, ardınca zirehli texnikalarla qoşunlar hücuma başladı. Sərhəddə ağır döyüşlər gedir”.
Rəsmi Moskva və Kiyev hücumla bağlı hələlik rəsmi açıqlama yaymayıb. Lakin Rusiyalı bloggerlər Ukrayna qüvvələrinin Tyotkino istiqamətində sərhədi iki mövqedən keçməyə çalışdığını göstərən xəritələr dərc ediblər.
Kursk vilayətinin qubernatoru Aleksandr Xinşteyn bildirib ki, hücum nəticəsində üç nəfər həlak olub. O, Telegram kanalında yazıb: “Ukraynaya məxsus FPV-dron Lada Largus avtomobilini vurdu, nəticədə iki qadın həyatını itirdi”. Xinşteyn əlavə edib ki, ayrı bir insidentdə 53 yaşlı kişi avtomobilinə partlayıcı qurğu atılması nəticəsində həlak olub.
