İranın Sistan-Bəlucistan əyalətində "Mossad agenti" kimi ittiham olunan bir şəxs edam olunub.
İranın rəsmi ədliyyə orqanlarına məxsus Mizan Online platformasının verdiyi məlumata görə, edam hökmü Zahidan şəhərindəki həbsxanada icra edilib.
Şəxsin kimliyi açıqlanmayıb, lakin İran mediası onun İsrailin kəşfiyyat xidməti ilə əməkdaşlıq etdiyini və sionist rejimin xeyrinə casusluqda təqsirli bilinərək ölüm cəzasına məhkum edildiyini açıqlayıb. Ona eyni zamanda ictimai asayişi pozmaq məqsədilə məxfi məlumatların toplanması və Mossad-a ötürülməsi kimi ittihamlar irəli sürülüb.
İran hökuməti son illər ərzində İsrailə və digər xarici ölkələrə işlədiyini iddia etdiyi bir sıra şəxsləri casusluqda ittiham edərək edam edib. 2022-ci ilin dekabrında da oxşar ittihamlarla dörd nəfər asılaraq edam edilmişdi.
İran və İsrail arasında rəsmi diplomatik münasibətlər tamamilə yoxdur. İki ölkə illərdir "kölgə müharibəsi" aparır. Bu, həm kiberhücumlar, həm də sui-qəsdlərlə müşayiət olunan uzunmüddətli gərginlikdir. Tehran, İsraili öz nüvə proqramını hədəf alan təxribat aktlarında günahlandırır.
Qeyd edək ki, Beynəlxalq hüquq-müdafiə təşkilatlarına görə, İran ildə ən çox edam həyata keçirən ölkələr sırasında Çindən sonra ikinci yerdədir. Norveçdə yerləşən İran İnsan Haqları qrupunun noyabr hesabatına əsasən, İranda bu ilin əvvəlindən bəri 600-dən çox insan edam olunub və bu, son səkkiz ilin rekord göstəricisidir.
