İran hökuməti Böyük Britaniyada bir neçə vətəndaşının casusluq ittihamı ilə həbs edilməsinə kəskin etiraz bildirib və bu məsələ ilə bağlı Britaniyanın Tehrandakı müvəqqəti işlər vəkilini çağırıb.
"Bizimxeber" bildirir ki, İranın dövlət xəbər agentliyi IRNA həbsləri "siyasi motivli" adlandıraraq qeyd edib: "Böyük Britaniyada bir sıra İran vətəndaşlarının əsassız həbslərindən sonra... Britaniyanın Tehrandakı nümayəndəsi bazar günü Xarici İşlər Nazirliyinə çağırılıb".
Hadisə ilə bağlı İslam Respublikasına casusluqda ittiham olunan üç iranlı şəxs — 39 yaşlı Mostafa Sepahvand, 44 yaşlı Fərhad Cavadi Manesh və 55 yaşlı Şapur Qalehali Khani Noori şənbə günü London məhkəməsi qarşısına çıxarılıb. Onlar 2024-cü ilin avqustundan 2025-ci ilin fevralına qədər casusluq fəaliyyəti ilə məşğul olmaqda ittiham olunurlar.
Britaniyanın Daxili İşlər Nazirliyi qeyd edib ki, bu şəxslər 2016-2022-ci illər ərzində kiçik qayıq və ya avtomobildə gizlənərək ölkəyə qanunsuz yollarla daxil olublar.
İngiltərə polisi bildirir ki, dördüncü bir şəxs də mayın 9-da eyni istintaq çərçivəsində saxlanılıb, lakin ittiham irəli sürülmədən sərbəst buraxılıb.
Eyni zamanda, mayın 3-də aparılan ayrı bir araşdırma çərçivəsində daha beş iranlı saxlanılıb. Onlardan dördü sonradan sərbəst buraxılıb, beşinci şəxs isə naməlum tarixə qədər zaminə buraxılıb. Polis bu istintaqların fəal şəkildə davam etdiyini bildirib. İran tərəfi həbsləri "əsassız" və "siyasi təzyiq vasitəsi" kimi qiymətləndirərək, bu addımların iki ölkə arasında gərginliyi artırdığını vurğulayıb.
