Dünyaca məşhur texnologiya nəhəngi Apple, bu ilin payızında təqdim olunacaq iPhone 17 seriyası üçün qiymət artımına hazırlaşır.
"Bizimxeber" bildirir ki, bu barədə The Wall Street Journal öz mənbələrinə istinadən xəbər yayıb.
Şirkətin bu addımı ABŞ-ın Çin mallarına tətbiq etdiyi 20%-lik tariflər fonunda atdığı bildirilir. Donald Tramp administrasiyasının tətbiq etdiyi bu ticarət tarifləri hələ də qüvvədə qalır və Apple bu xərcləri balanslaşdırmaq üçün iPhone 17 modellərinin qiymətlərini artırmaq niyyətindədir.
Lakin Apple tariflərin adını açıq şəkildə çəkmədən, yeni dizayn və funksiyalarla bu artımı əsaslandırmağa çalışır. İstehsalın bir hissəsi artıq Hindistana köçürülsə də, flaqman modellər – iPhone Pro və Pro Max – hələ də əsasən Çində istehsal olunur.
Analitiklər hesab edirlər ki, Hindistan 2026-2027-ci illərdə ABŞ bazarının tələbatını qarşılaya biləcək səviyyəyə çatacaq, lakin Çin komponentlər baxımından hələ də əsas tədarükçü olaraq qalacaq.
Digər tərəfdən, Apple son bir ildə Hindistandakı iPhone istehsalını 60% artırıb. Hazırda bu ölkə Apple-ın ümumi iPhone istehsalının 20%-ni təmin edir – bu da 22 milyard dollar dəyərində məhsula bərabərdir. Bununla belə, şirkətin Hindistan smartfon bazarındakı payı hələlik cəmi 8%-dir.
