Ermənistanın Avropa İttifaqına (Aİ) üz tutmaq istəyi və bu istiqamətdə parlamentdə atılan addımlar, Moskvanın sərt və birmənalı reaksiyasına səbəb olub.
Rusiya rəsmiləri açıq şəkildə bildirirlər ki, Ermənistan eyni vaxtda həm Avropa İttifaqının, həm də Rusiya liderliyindəki Avrasiya İqtisadi İttifaqının (Aİİ) üzvü ola bilməz. Bu xəbərdarlığı ilk səsləndirənlərdən biri Rusiya xarici işlər nazirinin müavini Mixail Qaluzin olub.
RİA Novosti-yə danışan Qaluzin, İrəvanın Aİ və Aİİ arasında seçim etməli olduğunu deyib.
Aİİ "bərabərhüquqlu dövlətlərin birliyi" olduğu halda, Aİ "çubuq nizam-intizamının Rusiya əleyhinə rəvayətlərə tabe olduğu" bir qurumdur.
"Ermənistan cəmiyyətinə Aİİ üzvlüyünün bütün faydaları və Aİİ-dən ayrılmanın itkilərinin miqyası izah ediləcək". Buna baxmayaraq, son qərarın İrəvana aid olduğunu da əlavə etdi.
Bu fikri Rusiya baş nazirinin müavini Aleksey Overçuk da təkrarladı. O, Ermənistanın "iki kresloda otura bilməyəcəyini" bildirərək, Aİİ və Aİ arasında seçim zərurətini qeyd etdi, lakin bunun Ermənistanın daxili işi olduğunu da vurğuladı.
Bu bəyanatlar Ermənistan parlamentinin ölkənin Aİ-yə daxil olmaq niyyətini əks etdirən qanun layihəsini qəbul etməsindən sonra gəldi. Hərçənd Ermənistan hələ Aİ-dən rəsmi dəvət almayıb, bu addım İrəvanın xarici siyasət vektorunu dəyişdirmək istəyinin göstəricisi kimi qiymətləndirilir.
Üstəlik, bu yaxınlarda Ermənistan Xarici İşlər Nazirliyi, ölkənin Kollektiv Təhlükəsizlik Müqaviləsi Təşkilatının (KTMT) maliyyələşdirilməsini nəzərdə tutan sənədi imzalamaqdan çəkindiyini bildirdi. Bu da İrəvanın Rusiya liderliyindəki hərbi blokdan uzaqlaşdığının daha bir siqnalıdır.
Ermənistan iqtisadiyyatı böyük ölçüdə Rusiya və Aİİ bazarlarından asılıdır. Aİİ-dən çıxmaq ciddi iqtisadi itkilərə səbəb ola bilər. Qaluzinin "itkilərin miqyası" ifadəsi də məhz buna işarədir.
