Rusiya Federal Təhlükəsizlik Xidməti (FSB) Üçüncü Reyxin son günləri və Adolf Hitlerin ölüm şəraiti ilə bağlı arxiv sənədlərinin məxfiliyini ləğv edib. Bu barədə “İzvestiya” qəzeti məlumat yayıb.
FSB-nin İvanovo vilayəti üzrə İdarəsinin dərc etdiyi sənədlər sayəsində, Hitlerin 1945-ci ilin aprelində Berlin bunkerində intiharı ilə nəticələnən hadisələrin xronologiyasını yenidən qurmaq mümkün olub. Arxivdə təqdim olunan məlumatlar əsasən, SMERSH hərbi əks-kəşfiyyat qrupunun Berlinin işğalından sonra apardığı istintaq fəaliyyətlərinə əsaslanır.
Arxivlərə görə, Berlinin süqutundan dərhal sonra SMERSH əməkdaşları tərəfindən Hitlerin yaxın çevrəsindən bir sıra şəxslər saxlanılıb. Onların arasında:
General Helmut Veydlinq – şəhərin müdafiə komandiri, Hans Baur – Hitlerin şəxsi pilotu, Hans Rattenhuber – Reyx Təhlükəsizlik Xidmətinin rəhbəri yer alır.
Sənədlərdə həmçinin 1945-ci il 5 may tarixində Reyx kanslerliyinin bağçasında pis yanmış kişi və qadın cəsədlərinin tapılmasına dair məlumatlar da yer alıb. Meyitlərin Hitlerin və sevgilisi Eva Brauna aid olduğu ehtimal edilir. Cəsədlərin bomba sığınacağından təxminən üç metr aralıda, torpaqla örtülü vəziyyətdə tapıldığı qeyd olunur.
