Hindistanın son hava hücumu Cənubi Asiyada gərginliyi yeni mərhələyə daşıdı. Pakistanın Baş naziri Şehbaz Şərif, Milli Assambleyanın xüsusi iclasında çıxış edərək, bu hücumu "böyük bir strateji səhv" adlandırıb və nəticələrinin qaçılmaz olacağını bəyan edib.
Baş nazirin sözlərinə görə, Pakistan Silahlı Qüvvələri Hindistanın iri hava hücumunu uğurla dəf edib. O qeyd edib ki, Pakistan Hərbi Hava Qüvvələri (PAF) Hindistan təyyarələrinin sistemlərini zədələyərək, onları geri çəkilməyə və Srinagarda enməyə məcbur edib. Hücum zamanı Hindistan tərəfindən azı 80 təyyarə iştirak edib. Beş qırıcı təyyarə vurulub və Bathinda da daxil olmaqla müxtəlif bölgələrdə qəzaya uğrayıb. Eyni zamanda, iki pilotsuz uçuş aparatı da məhv edilib.
Hücum zamanı Pakistan vətəndaşları şəhid olub
Baş nazir hücum nəticəsində qadın, uşaq və kişilər də daxil olmaqla bir neçə Pakistan vətəndaşının şəhid olduğunu təsdiqləyib. Milli Assambleyada şəhidlərin ruhuna bir dəqiqəlik sükut elan olunub və dualar oxunub.
“Qaranlıq gecəni gümüşü şəfəqə çevirdik”
Şərif emosional çıxışında Hindistanın Pakistana qarşı gecə vaxtı hücumunu sərt tənqid edərək, bu dəfə silahlı qüvvələrin misilsiz cavab verdiyini vurğulayıb: “Silahlı qüvvələrimiz qaranlıq gecəni gümüşü şəfəqə çevirdi”.
Baş nazir həmçinin Pahalqam hadisəsində Hindistanın Pakistanı araşdırma aparılmadan günahlandırdığını xatırladıb. O bildirib ki, Bəlucistandakı qatar qaçırma hadisəsində Pakistanın apardığı araşdırmalar TTP və Hindistan arasında əlaqələrin olduğunu ortaya çıxarıb. “Hindistan bu hadisəni qınamaq əvəzinə bizim faciəmizə lağ etdi”, – deyə Şərif bildirib.
Baş nazir beynəlxalq və qərəzsiz araşdırma təklifi verdiyini xatırladaraq, Pakistanın tam əməkdaşlığa hazır olduğunu bildirib. Lakin Hindistan bu təklifi qəbul etmək əvəzinə Pakistan səfirini çağıraraq diplomatik təzyiq göstərib.
Baş nazir parlamentdə ordu, hava və dəniz qüvvələrinin rəhbərlərinin şücaətinə görə rəsmi təltif olunmasını təklif edib. O, həmçinin siyasi partiyalara çağırış edərək, Pakistan Konstitusiyası və milli maraqlar naminə birləşməyə səsləyib: “Gəlin dünyaya göstərək ki, biz bir millətik. Bu nüvə müharibəsi deyil, amma Pakistan cavab verməyə qadirdir”.
Şərif bildirib ki, bu qarşıdurma nüvə xarakteri daşımır, lakin Pakistan heç bir adi hərbi əməliyyatda da geri qalmayacaq qədər güclüdür. “Şahinlərimiz beş Hindistan təyyarəsini vurdular – bu, on da ola bilərdi”, – deyə o vurğulayıb.
