ABŞ prezidenti Donald Trampın gecə saatlarında elan etdiyi ikitərəfli tariflər dünya gündəmində ciddi səs-küy yaradıb.

Çin, Kanada, Cənubi Koreya və Avropa ölkələri qərara dərhal reaksiya verib. Avropa Komissiyasının sədri Ursula von der Leyen ABŞ-ın yeni tarif siyasətinə qarşı əlavə tədbirlər görmək üçün hazırlıq apardıqlarını bildirib. 

Almaniya hökuməti Aİ-nin Trampa qarşı "balanslı, aydın və qətiyyətli cavab" verməyə hazır olduğunu açıqlayıb. Fransanın hökumət sözçüsü Sofi Primas isə Aİ-nin iki mərhələli cavab planı hazırladığını və ilkin addımların aprel ayının ortalarında atılacağını bildirib.

Almaniya və Fransa sərt mövqe sərgiləyir

Almaniyanın İqtisadiyyat naziri Robert Habeck Berlinin ABŞ-ın yeni tariflərə dair danışıqlar yolu ilə həll yolu tapmasını dəstəklədiyini, lakin bu cəhdlərin uğursuz olacağı halda Avropa İttifaqının güclü addımlar atacağını qeyd edib.

Almaniya, ABŞ-ın ən çox ixrac etdiyi ölkələrdən biri olduğu üçün tariflərdən ciddi təsirlənəcək. Habeck xəbərdarlıq edib ki, ABŞ-ın bu siyasəti "qlobal iqtisadiyyatı tənəzzülə sürükləyə" bilər. O, Trampın yeni vergi siyasətini tənqid edərək bildirib: "ABŞ istehlakçıları üçün bu, Qurtuluş Günü deyil, İnflyasiya Günü olacaq."

Fransanın hökumət sözçüsü Sofi Primas isə bildirib ki, Avropa İttifaqı ABŞ ilə "ticarət müharibəsinə hazırdır" və Trampın tariflərinə cavab olaraq onlayn xidmətləri hədəf almağı planlaşdırır. “Bizim bir sıra alətlərimiz var və biz bu ticarət müharibəsinə hazırıq” – deyə Primas vurğulayıb.

Fransa rəsmiləri ilkin olaraq polad və alüminium məhsullarına tariflər tətbiq edəcəklərini, daha sonra isə ABŞ-ın rəqəmsal xidmətlərinə qarşı tədbirlər görüləcəyini bildiriblər.

"The New York Times" qəzetinin təhlilinə görə, Aİ-nin bu addımları ABŞ-ın texnologiya nəhənglərinə ciddi təsir edə bilər. Qəzet yazır ki, ABŞ dünya üzrə ən böyük xidmət ixracatçısıdır və bu sahədə ötən il təxminən 300 milyard dollarlıq ticarət profisiti əldə edib.

"Avropa İttifaqı ABŞ-dan gələn məhdudlaşdırıcı xidmətlərə cavab olaraq rəqəmsal xidmətlərə məhdudiyyətlər qoya bilər. Bu isə ABŞ texnologiya nəhənglərinə ciddi təsir edəcək."

Aprel ayının sonuna qədər Aİ-nin konkret addımları açıqlayacağı gözlənilir.