.jpg)
Avropa Komissiyasının müdafiə məsələləri üzrə komissarı Andrius Kubilius Avropa İttifaqı ölkələrini ABŞ-ın hərbi dəstəyinə güvənmədən öz müdafiə gücünü artırmağa çağırıb. Litvanın LRT telekanalına müsahibəsində çıxış edən Kubilius, Avropanın təhlükəsizliyi üçün daha çox məsuliyyət daşımalı olduğunu bildirib.
“Biz ABŞ-ın Avropa təhlükəsizliyində iştirakının daim azalmasından xəbərdar olmalıyıq və məsuliyyəti öz üzərimizə götürməyə hazır olmalıyıq,” – deyə o, vurğulayıb.
Kubilius bildirib ki, Vaşinqtonun gələcəkdə əsas diqqətini Hind-Sakit okean regionuna yönəltməsi ehtimalı yüksəkdir. Bu səbəbdən, Avropa müdafiəsini xarici gücə deyil, daxili potensiala əsaslandırmalıdır. “Mən rəqəmləri təkrarlayıram: 450 milyon avropalı, 340 milyon amerikalıya Avropanı, 38 milyon ukraynalının qarşısında aciz qalan 140 milyon rusdan qorumaq üçün yalvarmamalıdır,” – deyə komissar sərt tonda əlavə edib.
Kubilius, Avropada müdafiə sənayesinə sərmayələrin artırılmasının vacibliyini vurğulayıb. Onun fikrincə, Avropa öz hərbi istehsal imkanlarını artırmalı və strateji liderlik nümayiş etdirməlidir: “Bu, liderlərdən və dövlət başçılarından aydın strateji anlaşma, eləcə də real həll yolları tələb edir... Biz öz istehsalımızı inkişaf etdirməliyik. Bu, bizim ümumi vəzifəmizdir.”
O, həmçinin transatlantik münasibətlərdə yaranacaq ehtimalı olan xaotik gərginliklərə qarşı xəbərdarlıq edib və təhlükəsizlik sistemində islahatlara tədricən, ölçülü yanaşmanın vacibliyini qeyd edib: “Hazırlıqsız olmaq və ya amerikalılarla qəzəbli, xaotik ayrılıqlara getmək daha pis nəticələr doğura bilər.”
Müsahibəsində Kubilius həmçinin bildirib ki, Rusiya tez-tez ona aid edilən real gücə malik deyil və Ukraynada başlatdığı müharibədə qələbə qazanmaq iqtidarında deyil. Onun fikrincə, Rusiyanın Aİ-yə qarşı təhdidlərini neytrallaşdırmaq üçün Avropanın hərbi və siyasi baxımdan daha yetkin və müstəqil mövqe tutması vacibdir.
